逾20年再踏叱咤台板！莫文蔚奪至尊歌曲威到盡

《叱咤樂壇流行榜頒獎典禮2020》歌曲獎第5位，是馮允謙的《地球來的人》，上台他即爆喊；第4位是許廷鏗的《無力感》，他謂：「呢首係今年隻碟第1隻做嘅歌，今年識咗好多新嘅音樂人，想講嘅嘢都喺歌詞度。」

第2位是Dear Jane的《銀河修理員》；而「叱咤樂壇至尊歌曲大獎」，是莫文蔚的《呼吸有害》，她身穿露背高衩晚裝，並佩戴逾千萬元的珠寶首飾從後台行出來，她開心謂：「呢一刻用不可思議嚟形容，在座大部分都係我嘅後輩歌手，第1次見，好開心！好特殊，我好少喺香港出現，亦好少喺頒獎禮出現，呢28年都係嚟過叱咤2、3次，今日返嚟屋企，香港係我起步點，有咁有分量嘅厚禮，真係冇諗過，我走咗個大圈返嚟，好圓滿！」見到此時許廷鏗在台下影相，十足小粉絲，原來莫文蔚是自1999年後再踏叱咤台板。

連唱15分鐘經典歌

表演環節，成了她的舞台，唱出一連串廣東歌Medley，先播出1999年她獲張國榮頒獎的片段，其後唱出《左右手》向對方致敬，並接連唱出張學友、郭富城、陳奕迅、謝安琪的金曲，期間她又表演彈古箏，唱完台下歌手即企起身拍手歡呼。

莫文蔚離開時興奮受訪：「其實好大壓力！唱咗20幾首叱咤至尊歌、我最喜愛歌，全部都係最Hit嘅歌，一定要唱好人哋啲歌，不容有失！為咗個編曲絞盡腦汁，12月頭由英國返香港隔離就已經用Zoom開會準備。」演出引誘「出山」？她笑話：「《呼》上年推出已經Hit中好多人嘅心，真係好難得！好耐冇唱廣東歌，行內都話我喺時候要返嚟見大家，加上又想返嚟見媽咪，呢個時間真係個Perfect時機。」

講到獲「叱咤樂壇至尊歌曲大獎」，她表示好開心，因為從來都沒想過奪得女歌手獎或10大歌曲獎：「1999年由哥哥（張國榮）頒畀我嗰個係特別獎，咁啱我今年出道28年，攞到呢個咁有分量嘅獎真係好圓滿！」下一個獎向女歌手獎進發？她即耍手擰頭話：「唔使啦！依家係班後生嘅天下，繼承香港樂壇，今日見到好多後輩，啱啱個表演就係唱畀佢哋聽，同埋向前輩致敬。」

問到會否開紅館騷？她表示去年已試過入紙申請檔期，待疫情過去，希望今年可以開紅館騷。問到如何跟老公慶祝獲獎？她甜笑說過去10個月都跟老公「糖黐豆」一齊：「佢見少1日都唔制！（幾時返英國？英國有變種新冠肺炎，驚唔驚？）老公趁疫情嚴重之前返咗德國，希望歐洲疫情穩定，依家唔再飛嚟飛去啦，飛任何1個地方都要隔離好唔實際，不如留喺香港陪媽咪。」