重新「上市」　余曉彤大把人追

藝人余曉彤熱愛運動，潛水、跑山、打拳及武術等都難不倒她，去年更一口氣參加8個跑步賽事。運動方面滿分，其婚姻生活卻不太如意，去年底與圈外老公結束5年婚姻，即使結伴走過10多個年頭及育有4歲女兒，仍未能挽回感情。

問常做獨行俠的她會否想展開新戀情？她說：「一切看緣分，上天自有安排。（鍾意跑步嘅男士會加分？）都好嘅，我身邊都係運動人多，易啲分享。（依家凡事諗個女先？）會，一段關係唔係得自己，相處同磨合好緊要，冇得強求。（用咗幾耐平復失婚情緒？）最難捱嘅時間過咗，依家好平靜。（捨得放低咁多年感情？）依家同前夫係朋友，會見面傾偈，好過之前成日嗌交。」她坦言已準備接受新戀情：「有追求者，仲多咗添，但暫時選擇用最舒服嘅方式傾吓偈先。」