關智斌終於拎第1個叱咤個人獎：要攬住瞓

今年《叱咤樂壇流行榜頒獎典禮2020》閉門舉行，完騷後九展場內、場外都有大批Fans聚集，希望見到偶像一面，特別地庫停車場吸引過百名Fans守候，保安見狀隨即再加設3個鐵欄，以免Fans一擁而上。

剛踏入40歲的關智斌（Kenny）憑《暫定》獲第7位歌曲獎，而且更是他首個個人的叱咤獎項！受訪時他指再次獲獎好喜出望外，又攬實個獎唔放話「好墜手」：「如果唔計17年前BOYZ拎過組合獎之後，呢個獎係我第1個叱咤獎，之前嗰個獎擺咗喺Partner屋企，所以咁耐都冇掂過個獎！（今晚擺埋上床攬住瞓？）今晚成晚都會攬住佢！因為真係太難得、真係好開心！」

Kenny笑說因為受時間所限，未能好好逐一多謝公司團隊，問下年訂攞男歌手獎為目標？他表示：「真係唔諗呢啲住啦！我有呢獎已經好開心，畀咗我好大嘅動力，之後要更加做好音樂、做好啲歌，成日覺得自己喺做歌手唔夠立體，今年會更專注落音樂上。」