保錡疑係偷食慣犯　舊愛不齒：佢瘋狂道歉

藝人張沛樂（沙律）被爆戀上《全民造星》出身嘅ERROR成員吳保錡，兩人拍拖睇紅葉合照隨即曝光，沙律亦直認不諱，不過保錡嘅「正印女友」賴嘉賢（Carrie）尋日就出嚟指2人冇講過分手，3角戀變羅生門。

嬲到爆嘅Carrie今日就公開大爆保錡喺東窗事發後即刻瘋狂道歉，佢向Carrie表示2人存在矛盾多時，諗清楚先決意走人，又投訴融入唔到Carrie生活圈子等，惟火遮眼嘅Carrie態度堅決，揚言唔會原諒。

而羅生門事件更隨時變出N角戰，因Carrie對外晒出網友私訊，多人同時向佢表示保錡疑係「偷食慣犯」，除咗有聲稱係保錡嘅舊愛留言狂鬧保錡多次想約出嚟開房，又有網民晒出同保錡想約見面嘅對話截圖，更聲稱係保錡鄰居指見過佢帶個唔似Carrie嘅女仔返屋企等。

Carrie續公開與保錡嘅對話截圖，除暱稱保錡做「肥肥」，更證明2人最後對話係去年11月26日。

而Carrie其後又喺社交網發文，再度暗示有人一腳踏兩船，更指依家同男方冇關係，作出呢次回應後，就唔會再講：「不論我們感情如何，只是希望他知道變心都要完結上1段感情，才正式開始下1段，清清楚楚。因為若然他清楚跟我完結了，也不需要有這一兩天的新聞。因為起碼溝通，我也接受了。但如今我跟他沒有任何關係了，我也釋懷了，我不想因為這些事才出現在娛樂新聞，我想好像平時一樣努力做我的幕前工作。」