潔癖藝人逐個數!馬國明1日沖5次涼最誇張

2021年01月05日 18:00
東網電視
更多新聞短片
新冠肺炎肆虐,保持清潔最重要,口罩、消毒潔手液、消毒噴霧隨身攜帶,仲要勤洗手,唔好亂咁摸,呢啲基本常識,如果換轉係以前會被人覺得你有潔癖症。圈中確有唔少藝人有潔癖,本來鍾意乾淨係好事,但嚴重潔癖就變咗病態症。
柯震東接受唔到整亂佢張床,試過工作人員去佢屋企拍攝,睇咗佢張床,大被蓋過頭,佢即時攞起玩具槍想殺人。最誇張佢有收藏開漫畫人物,當漫威超英「邪神」洛基因為頭淩亂,佢要帶洛基去髮型店整頭髮。
羅志祥同周柏豪為咗唔想屋企廁所有尿漬,驚細菌彈嚟彈去,要坐喺度屙尿。羅志祥仲嚴重唔會去戶外嘅廁所,唔可以喺屋企食餅乾,因為驚有餅碎。另外,唔可以容忍張床有灰塵,識過有朋友唔知道,坐咗喺佢張床上,佢即時要換床單,仲同個朋友反面。另外浴室都唔可以有水漬,沖涼用品底唔可以濕,沖完涼要擦乾淨。
古天樂除咗1日必定要洗兩次頭髮外,一拍完戲要即刻沖涼。屋企要一塵不染,執得好整整齊齊,食完嘢要即時清理,半刻都唔可以留喺枱。
馬國明好鍾意沖涼,開工有空檔都會去涼,誇張到最高紀錄1日沖5次涼,總之唔可以畀個身有立黐黐嘅感覺。田亮就1天最少沖3次涼,去到邊都帶備消毒紙巾,上飛機更好似大清洗,每個地方都要徹底抺過。
李冰冰都有嚴重潔癖,據知朋友去佢屋企一入門一定要換佢安排嘅拖鞋,梳化唔可以坐,留長頭髮嘅女仔去到一定要束起頭髮,唔容許有頭髮掉咗喺地下。
陳智燊每次旅行都要花兩日時間執行李,仲要每樣嘢都要包好,放得好整齊,返嚟行李要抺好晒先拖入屋,之後每一件嘢要分類再抺。