丁子朗認「處男」表現慘不忍睹：反應都唔識

藝人丁子朗下午出席《堅離地愛堅離地》宣傳活動。談到他將以主角身份出演《香港愛情故事》監製林肯執導的青春劇，子朗表示：「未接到最後通知，不過過年期間我借頭借路同監製『拜年』，順便問吓佢，佢話應該有合作機會嘅。」

子朗坦言自己出道4年，如今遇上難得機會，自己亦感壓力：「盡量做好自己啦，要努力啲，唔會令大家失望，話晒呢套劇口碑氣勢如虹。（同戴祖儀合作喎。）我知佢有去面試，希望得啦，我哋合作慣咗互寸嘛。」

至於《堅》劇是自己處男作，子朗形容演技慘不忍睹：「有時連反應都唔識，好彩嘅話張振朗喺隔籬提點吓，佢唔喺度我就唔知點，有好大嘅進步空間。」他坦言拍竣《堅》劇後，自己即跟彭秀慧上堂學習演技：「老師真係幫咗我好多。」