孖李錦聯互窒　安德尊寸爆：我幫佢做1次司儀佢離1次婚

無綫新煮食節目《煮場爭霸》由兩位名廚Ricky（張錦祥）及黃亞保做主角鬥廚藝，每集請嚟唔同嘉賓品嘗及評分，尋晚（6日）就搵嚟盛傳不和嘅歡喜冤家安德尊（大王）同李錦聯師傅，點知今次就「妹仔大過主人婆」，2人句句有骨互寸。

早年喺《都市閒情》煮食環節不斷開火嘅大王同李錦聯，今次一見面就即火花四濺，頻頻毒舌互窒，好似當中李錦聯先開口：「大王你就冚蓋得喇！我老婆唔畀我冚蓋，因為怕我滾得太犀利。」點知大王就拎李錦聯婚姻開玩笑：「李師傅結咗三次婚喇。（唔係四次？）呢次未離，我幫佢做2次司儀，做完1次離1次。」

節目中，而大王又揚言同李錦聯唔需要合作：「唔好話『我哋』，佢還佢，我還我…」轉個頭李錦聯又寸一句：「呢個湯要3個鐘？但大王時日無多。」真係金句連場，網友都狂讚呢對組合係高手過招呀！