太窮自卑唔敢追DJ關寶儀!安德尊娶「20年情」助手?

2021年01月09日 19:17
東網電視
更多新聞短片
藝人安德尊(大王)接受車淑梅電台訪問,對曾有傳他是中英混血兒,他說自己是河南開封人,對於誤傳原因是有人玩遊戲節目,問起這問題,但又找不到他證實,結果誤傳他是混血兒而已。他透露是窮家出身,父親是海員,一家七口蝸居於百尺板間房,少時常跟外婆看戲,自小發明星夢,亦想過做醫生,更自爆當年曾追女仔追到菲律賓修讀藥劑學,惜女友去世,他未完成大學課程便返港。他更剖白感情事:「我咁大個仔唯一心儀嘅就係當年喺電台遇上嘅關寶儀(90年代電台DJ),不過依家人哋都已結婚,我當年因為窮出身唔敢高攀咁好嘅女仔,我哋仲係好好朋友。」車淑梅姐單刀直入問其助手跟了他近20年,尚未迎娶對方?安德尊即搶答:「哈哈!我希望佢係啦!總之你儲定人情,不過講真,我唔想結婚,因為適婚年齡已經過咗,人稱我鑽石王老五仲好笑!20年前我一時愚昧聽人講戴鑽石會幸運,有光環吸力量,買咗1卡價值4萬幾嘅鑽石,在鏡頭前閃吓閃吓,後來畀人笑,戴咗1年半載除咗唔敢戴,哈!」
入行34年,行內出名好人緣,他與余慕蓮(魚毛)份屬好友,他說:「因師傅曹達華關係,我哋時時見面,佢(魚毛)視我親如子侄,佢嗰晚入ICU前打畀我,話出得嚟就再見,出唔返就下世見,我心都實埋,講唔到嘢,我話『放心,我幫你都係舉手之勞』。」他說魚毛尚未決定物業捐去哪個慈善機構。
另外,提到他與名廚李錦聯成鬥氣冤家,大王直言:「唔啱就係唔啱,頂嘴就係頂嘴,唔係故意!佢煮餸好叻,對食材好叻,不過有時畀我捉到佢甩漏,係佢唔好彩,因為佢唔夠仔細,抽秤抽秤吓就慣咗咯⋯⋯我哋都好好傾,佢飲咗酒我就唔同佢傾,佢唔飲酒我就傾,不過佢飲咗之後其實仲好傾,成個李白坐喺漁船上嘅感覺咁搖吓搖吓,我有講過叫佢唔好飲咁多,但係我知道呢啲係佢嘅人生樂趣。」
向來愛穿西裝的他,原來是關曹達華事,他說師父說過做明星要有明星款,不要失禮,所以他為氹老人家開心,次次都執到正,慢慢成為習慣,衣櫃共有200套西裝之多,他說:「人哋話我戴冇鏡片眼鏡、着西裝為行運,真正原因係眼鏡反光,唔想打燈師傅爬上爬落咁危險,最重要有一次我去電台泊車,除低咗副眼鏡,畀保安問我係邊位,我要戴番副眼鏡佢先認得我,自此我唔敢除眼鏡喇!」