《愛．回家》奪演藝大獎　劉丹：我估唔到！

《萬千星輝頒獎典禮2020》由汪明荃帶領開場，指一班藝人在疫情仍然努力工作，向他們致敬之餘，亦為他們爭取加薪，之後頒發「萬千光輝演藝大獎」，並破天荒由劇集《愛‧回家之開心速遞》奪得，劉丹率領全體演員上台，並由監製林建祥領獎。對於奪獎，劉丹說：「我估唔到，舊年我都係第一個攞，我哋喺年輕有為嘅監製祥哥帶領下，大家愈拍愈開心，呢個戲咁成功，要多謝TVB，多謝珍姐（曾勵珍），佢拍咗好多好受歡迎嘅長壽節目，仲要多謝隔籬嘅阿姐汪明荃，因為佢同我哋爭取加人工。」之後，劉丹再率領各位同事大嗌：「多謝阿姐！」