《大叔的愛》主角撞晒樣!許廷鏗撩劉丹合作玩BL

2021年01月13日 18:07
東網電視
更多新聞短片
歌手許廷鏗(Alfred)今日為謝茜嘉主持的開電視節目《旅遊達人滯遊香港》擔任嘉賓,謝茜嘉表示會帶對方去民宿Staycation,而Alfred就會親自下廚作回禮,他自稱於飲食方面比唱歌專業,更抵死的笑說他是個被歌手生涯耽誤的廚師:「其實都係由上年後半年先開始煮嘢食,西餐會拿手啲。」記者打趣叫他根據專業程度來排列「歌手」、「牙醫」及「廚師」,他笑說:「梗係牙醫先,歌手同廚師係頗相若,不過我係唔會放棄唱歌,呢方面有好多進步嘅空間,但食嘢冇得再進步,因為要Keep fit。」
講到謝茜嘉跟摩洛哥男友拉埋天窗,成為人妻,Alfred表示有恭喜對方,又指叱咤當晚怕「闖禍」:「佢係私下同我講先,但嗰陣未知佢對外公布咗未,就喺個台上面恭喜佢。」有傳謝茜嘉婚後嫁雞隨雞離開電台,她再澄清沒有此事,不過之後都會跟老公返摩洛哥見家長:「唔返去嘅話驚佢哋唔承認我,哈哈!但疫情真係打亂晒計劃。(會生BB?)冇呢個打算,因為我哋都好鍾意去旅行。」
另外,談及ViuTV即開拍港版日劇《大叔的愛》,網民一致認為跟劇中主角「撞樣」的Alfred及劉丹是最佳演出人選,Alfred聞言爆笑話:「搞笑戲都會想試吓,睇吓丹爺肯唔肯同我玩。」