戴祖儀當咗Nichkhun係老公：開關去韓國追夫！

歌手戴祖儀憑住長腿成功俘虜唔少粉絲，成為宅男女神！估唔到社交網擁有約20萬粉絲嘅佢，今次見到偶像即時變成小粉絲，同偶像一齊擺心心手勢影靚相！究竟係邊個有咁大魔力？原來係韓國男團2PM嘅泰籍成員Nichkhun，佢被封係隊中最靚仔成員之一，難怪戴祖儀都心心眼！

佢喺社交網自爆15歲嗰年已經鍾意對方，更將自己同對方畫成漫畫人物，幻想同佢「拍拖」！佢留言：「嗚嗚嗚我真係好開心好開心，想當年日日睇《我們結婚了》都睇到又開心又嬲，點解唔係我同佢結婚，我都想日日叫佢起身，原來見到以前最愛嘅偶像，係會感動到跑去無人嘅地方，大叫幾聲同喊出幾滴淚，我決定開關第一站會係韓國，無一頭半個月都唔返香港啦，我要去追夫！」