歐鎧淳腿張開跳鋼管舞　自嘲未有勇氣跳畀觀眾睇

香港女飛魚歐鎧淳向來積極操練，但近日天氣寒冷，加上游泳池暫停開放，故佢暫時放低女飛魚身份，惟有唔跳落水，改為大跳火辣鋼管舞！

其實佢跳鋼管舞都已經一段時間，除咗喺屋企安裝鋼管苦練之外，之前連出海喺船上都唔放過機會，技癢即席表演，大騷逆天長腿，玩腿張開！今日佢喺社交網透露孖住好友，齊齊着住火辣舞衣，大騷美好身段兼蜜桃臀，為大家喺咁凍嘅天氣暖一暖，佢留言：「呢一次叫做跳咗week 8 performance，值得出post紀念紀念，唔知未來我有冇勇氣跳有觀眾嘅performance？」