李嘉欣鍾嘉欣都Out?「新」嘉欣Sss極速彈起搶灘

2021年01月14日 15:50
東網電視
更多新聞短片
正所謂「唔怕生壞命,最怕改壞名」,宇宙有個永恒定律,就係叫親「嘉欣」嘅都係靚女兼有運行,由「大美人」李嘉欣、「華姐冠軍」鍾嘉欣、新鮮出爐「馬國視后」龔嘉欣以至「新聞之花」陳嘉欣,同名嘅佢哋一樣係靚絕人前!不過新時代降臨,娛樂圈慢慢出現「新」嘉欣,呢班後起之秀同樣好「嘉欣」!
先講嘅係現年28歲嘅蔡嘉欣,本身係KOL嘅佢喺網上有一定知名度,2019年毅然跳入娛樂圈呢個大染缸參選香港小姐,雖然最後5強止步,但加入TVB後備受力捧,工作量不斷,遠遠多過冠軍黃嘉雯!雖然曾經因為1句「感謝疫情」被網民鬧爆又被指拜金,但愈戰愈勇,現時社交網坐擁14萬粉絲!除咗主持節目《姊妹淘》,最近更參演劇集《飛虎之壯志英雄》、《智能愛(AI)人》、《金宵大廈2》,又識得定時喺網上晒性感照冧網民,「錢」途的確一片光明!
憑《全民造星III》成功打響名堂嘅鄭嘉欣(Christine)係模特兒,現年28歲,身高1米78,擁有44吋招牌長腿,名副其實嘅9頭身,仲有「港版石原聰美」之稱,社交網有4.6萬追蹤者!雖然《造星III》只係入到最後50強,但比賽外就成功脫穎而出,早前更處女下海首次拍劇,不過佢話最愛嘅都係唱歌,唔會放棄歌手夢!
現年只有20歲嘅游嘉欣(游游),憑《#後生仔傾吓偈》開始受人注目,到最近喺《香港愛情故事》更成功彈起人氣急升!首次拍劇仲獻出螢幕初吻,演技自然不造作大受好評,出道短短2年間更已參與3套劇,包括《香港》、《使徒行者3》及《刑偵日記》!性格直率嘅佢曾自爆係A0(未拍過拖),又唔介意公開透露係「屋邨妹」,直言唔係羞恥嘅事!而嚟緊,佢仲會夥拍一眾女神及小鮮肉丁子朗拍攝青春劇,獲封為「湯洛雯接班人」!社交網粉絲由不足1,000人,到依家已有3.2萬人,真係大把世界呀!