【祖藍,你好嘢】數《老表》花生位 張繼聰半裸靚抽做廢柴老公

2021年01月14日 23:11
東網電視
更多新聞短片
藝人王祖藍回巢無綫再拍劇,令人十分期待!佢當年自編自導自演嘅《老表》系列,非常受歡迎,造就出好多經典,每一輯播出都成功掀起唔少熱話!唔知佢呢次回巢會創造咩經典呢?而依家等我哋先回顧吓《老表》有咩經典啦!
《老表》最有話題人物,一定係張繼聰!當時張繼聰唔太受網友歡迎,當時仲叫過佢做為「廢柴老公」!張繼聰喺《老表,你好Hea!》入面,有一幕太太謝安琪有份客串,阿聰爆咗句:「佢老公正廢柴嚟!」玩自抽!另外嘅對白「我要成為軟飯王」同埋「佢老公見一鑊打一鑊」,都成為一時熱話!
出面大隻嘅佢仲一脫成名、成功彈起!劇中佢表演以胸肌「震波」猜枚大放笑彈,睇到大家嘩嘩聲,呢一幕可以話大受歡迎,經典中嘅經典!其後佢備受無綫力捧,一劇接一劇,成功搣甩「軟飯王」污名。
以歌手身份出道嘅蔣志光,早年默默封咪「轉行」拍劇做綠葉,佢喺《老表,你好嘢!》有機會重開金口,獻唱當年自己嘅成名曲《相逢何必曾相識》,再將金曲改編成惡搞歌《相逢何必曾燒衣》,網民隨即將歌曲激推,唔夠24小時已超過30萬點擊,大批網民要求佢重回樂壇!
《老表》系列捧紅咗一堆主角,亦都帶挈唔少配角,好似「細細粒」陳嘉佳同「聶小茜」陳明恩!陳嘉佳3集《老表》都有份演出,陳嘉佳噸位夠晒勁,佢嘅出現已經好搶眼,而佢嘅演出都同樣搶鏡,當時仲獲網友封為女神,佢仲試幾次提名最佳女配角,可惜最後都係落敗!陳明恩外表係鬼妹,但講到一句流利廣東話,呢個組合令佢喺《老表》成功爆咗出嚟,之後仲帶挈佢參加歌唱節目《星夢傳奇》,仲贏埋季軍添!
《老表》嘅取材都好貼地,好似《老表,你好嘢!》咁,當時潮流興討論區,劇中虛構咗一個討論區,滲入「巴打」、「C打」文化!時事方面都跟得好貼,湯盈盈飾演嘅「導遊貞」,都似係影射「導遊珍」事件,對白同造型都似到足!