《愛．回家》許家傑扮犀利哥失敗　竟然Chok變金城武！

《愛．回家之開心速遞》今晚嗰集講到「送水輝」許家傑憑俊朗外貌成功洽談生意，被封為「放電王」，點知太鋒芒搞到大龍生唔高興，送水輝就改變形象減低電力，化身早年於網上瘋傳嘅內地流浪漢「犀利哥」。

日前佢喺社交網分享造型照，留言謂：「好少留長頭髮，對上一次...應該係流星花園時吧。」不過，原來不羈流浪漢同型仔男神只差一線，個個都話佢似金城武多過「犀利哥」，姚子羚忍唔住留言話：「做咩扮我男神金城武呀」，林子善亦留言讚扮咩都咁有魅力：「有型喎！就算你咩造型都係漆黑中嘅螢火蟲咁鮮明咁出眾。」