陳婉婷《堅離地》做女僕　學念魔法咒語！

「最索丫鬟」陳婉婷2019年9月離巢無綫，其離巢前最後一部作品《堅離地愛堅離地》終於解封在港播出，她坦言雖然未獲邀為劇集宣傳，但仍感到開心。提到劇中飾演KOL並以女僕裝示人，她表示事前做足功課：「我真係有去女僕Cafe幫襯，原來佢哋每次放低食物，都會念一次魔法咒語，見到客人又會用日文講『主人』、『歡迎主人返嚟』。」她續指離巢後加入直播行列，才明白KOL唔易做：「疫情下我冇工作，為咗維生半年內每一日都開Live，開足8個鐘，要唱歌、玩IQ題，又要記住每個粉絲嘅喜好、特點，先建立到關係。」而提到劇中飾演好友的黃心穎，她坦言2人並不相熟未有聯絡，反而與裕美因劇結緣成為好友。