獲黃靜藍熨衫！李日朗聞買樓寫女友名即迴避

藝人李日朗（Don）出席網上平台有線OTT的節目巡禮，為撐女友黃靜藍（Nam）主持的首個節目，2人着格仔情侶裝，即場炮製法式焦糖燉蛋，但全程其實是Don炮製！Don大爆女友為他第1次熨衫：「第1次同佢出席公開活動，純粹嚟支持佢，佢今日好好，將套衫熨好掛喺廳，拍拖3年第1次有咁待遇！（你似係投訴？）好明顯啦！」

他說女友第1次做節目較緊張，Nam坦言有向男友請教及偷師。問兩人是否已經同居，Don說：「我哋唔算同居，間中當我屋企係酒店，整亂就走，我就係執房阿叔！（有結婚計劃？）未有，做好自己先，有傾過呢個問題，需要時就買樓。（層樓寫女友名就當係求婚？）訪問要腰斬喇！」Don反問女友買樓會否寫他的名，Nam搞笑說：「梗係會，不過你有能力啲，你買寫我名先。」Don笑言會全力支持女友，達成她買樓的夢想。