Super～曾志偉打造獎門人最經典　天明夠食成世壽司

曾志偉獲TVB主席許濤點名，擔任無綫副總經理兼行政委員會特別顧問，負責綜藝及資訊娛樂節目。提起志偉，一定會諗「Super～」同埋「今次打和啦～」，真係睇字有聲！志偉打造嘅獎門人系列深入民心，仲做足10輯，由1995年做到2014年，都咪話唔勁！獎門人裏面有唔少經典遊戲，好似「超級無敵馬拉松」、「超級無敵排排坐」、「超級無敵估歌仔」、「天下無敵踢拖鞋」等，多到不能盡錄！

大騷常客　帶來歡笑聲

而洪天明係獎門人長駐嘉賓，佢仲有獎品獵人之稱，因為節目成日送出「花之戀壽司」，有網友粗略估計，天明起碼贏咗過萬件花之戀，真係可以食成世呀！志偉亦係大騷主持常客，喺萬千星輝賀台慶、香港小姐、國際華裔小姐、歡樂滿東華等等大騷，留下不少笑聲！

創意開劇　曾奪金像影帝

電視劇方面，志偉都有一手！好似早前重播嘅《女人俱樂部》，當時播出時都成一時熱話，除咗令一班藝人如李若彤、李麗珍、袁潔瑩、陳慧珊等翻Hit，亦帶挈一班年輕藝人如陳嘉寶、陳瀅、糖妹、王敏奕等爆紅！當然，志偉電影方面成績有目共睹，曾憑《雙城故事》獲得香港電影金像獎最佳男主角殊榮，而飾演《甜蜜蜜》嘅豹哥，亦成為經典。