手執不雅照?鄭爽傳劈價賣豪宅預還2億賠償金

2021年01月22日 09:51
東網電視
更多新聞短片
內地女星鄭爽接連被爆婚姻問題及欲棄養代母所生嘅一對子女,形象見底,更被全面封殺及脫粉,廣告商連番割席,劇集亦冇緣出街。有自稱係美國代孕機構負責人,爆料指鄭爽拖欠6.8萬美元(約54萬港元)代孕服務費。該負責人指鄭爽要求機構撫養2個小朋友,甚至開條件要求將孩子登記喺負責人名下,而鄭爽則每個月給予3萬元人民幣,孩子佢唔認亦唔想要,更加唔要孩子返中國,如果符合要求,鄭爽先會願意找清尾數。
全國「仇爽」情緒高緒,「前夫」張恒更表示自己同一對子女被迫留喺美國,有傳係因母親不配合辦理簽字之故,竟然有航空公司喺呢個時候「送暖」,公開表示等鄭爽簽字後,就會免費送張恒同兩個小朋友返中國,但就有網友質疑航空公司係博出名,抽水賣廣告,因為該公司應該冇美國航線。
2月流出不雅照無格版
不過隨即網上瘋傳疑似鄭爽本人經營嘅小號(私人帳號),突然發出一張「肉色打格仔」照片,揚言將於2月11日公布無碼原圖,頓時引發外界瘋猜是否同之前鄭爽爸爸指控張恒「多次出軌、手機錄女生不雅視頻」嘅說法有關。不過該社交網又忽然刪走留言,並指自己唔係鄭爽。
之後再有自稱係張恒好友嘅網民於社交平台爆料,先怒斥美國代孕機構負責人「湊熱鬧」玩踢爆,並指張恒一早就接咗一對仔女返屋企好好照顧,更透露細女剛滿1歲,兩兄妹都有分別進行「抓周」,哥哥拎籃球,而妹妹拎唇膏。至於鄭爽,不但沒未見過一對仔女,甚至連提都冇提,非常冷漠。
爆有「濫藥」習慣
然而,張恒好友再爆女方一直以來都有「濫藥」習慣,有指佢即使冇病,每日都會食1樽感冒藥,亦曾聽講鄭爽同韓星之間有曖昧。不過好友唔係單方面鬧爆鄭爽,佢又斥張恒「腦子進水」先會冧鄭爽。
潛水後頻換頭像
有網民發現事發後一直「潛水」嘅鄭爽雖停止更新社交網站發文,但發現佢偷偷修改某短視頻平台嘅個人簡介做「只能換換頭像了」,此舉動再辣㷫網民,怒指佢不知悔改,仲想繼續賺錢。
疑似張恒嘅前女友就喺網上發文表示:「還好跑得夠早,不然被吃乾淨的就是自己了。」似乎在影射曾傳出張恒用鄭爽錢。發文又直指照顧兩個小朋友本身就係張恒基本責任,而唔係為立好爸爸人設去做。
而鄭爽遭封殺致劇集、廣告及代言工作均「被消失」,有指合作方與品牌公司要求的賠償預計超過2億港元,網上再有爆料指她正出售其上海價值約1.8億港元豪宅,因急於套現,故嗌價低於市場價,更有指鄭爽要求盡快完成交易,兼買家睇樓前需要證明財力足夠。