富貴男友行外母政策!江嘉敏睇定婚戒好事近

2021年01月23日 00:01
東網電視
更多新聞短片
現年26歲、無綫上位小花江嘉敏愛情事業兩得意,被無綫力捧的她劇接劇冇停手、2年多前又成功箍實有米男友Anthony,雙方愛得黐纏,已達見家長階段。去年聖誕節前夕,嘉敏激罕上載合照放閃證男友地位。雖然她經常被負面新聞纏身,「拜金」、「姣溝」等指控迎面以來,但男友一直於背後做強大後盾,情比金堅。
正趕拍無綫新劇《黯夜守護者》(暫名)的她,一放假即抽時間陪愛郎。日前她以「戰鬥格」上陣,於寒冷天氣下僅穿一件頭長身毛衣配過膝長Boot,大騷「絕對領域」現身中環。她與男友坐在餐廳門口甜蜜開餐,見她出盡冧招,餵食、依偎及微笑放生電,氹得男友全程四萬咁口,並禮尚往來餵女友食意粉。
醫肚後,男方化身「龍友」幫女友影靚相,期間單膝跪低搵最佳角度,齋睇個款就知專業,之後更不怕危險,衝出馬路喪影。而嘉敏亦不遑多讓,互換崗位幫男友影相,一齊睇相時,她更從後攬實男友取暖,旁若無人。
2人準時於終止堂食的6時前埋單,嘉敏翹實男友手離開發現記者,問到是否趁冇工開拍拖?男友代答︰「梗係啦,影吓相咁囉!(好搏命喎你,有咁多車經過!)有研究嘅,呢方面我係專業,睇吓我社交平台就知,我梗係影得好過佢。(女友係專屬Model?)梗係啦,淨係一個㗎咋!」冧爆的嘉敏甜笑表示︰「我係專業畀人影。」再問是否好事近?男友笑笑口表示:「睇吓!」問到是否睇定戒指?他即講笑重提早前被指用「黑卡」購物一事︰「咁要用啱信用卡嘅!」
陪睇包包
隨後他們到商場會合嘉敏媽媽,3人先後進入多間名店Shopping,期間男方行「外母政策」,除了幫手排隊,見兩母女拿起「包包」時即不停畀意見,全程氣氛融洽,看來「跟得男友」有望變做「跟得女婿」!