懶理跌崩牙！張惠雅隔咗成日終於出城「變靚」

藝人張惠雅（Regen）早前喺網上發表「暴斃論」，令網友同朋友都好擔心！日前喺長洲踩單車時又冇啦啦整崩牙，不過話想瞓耐少少，所以將整牙計劃延期，但由於有個牙醫同佢講可能會感染，所以佢唔敢再拖，隔足成日今日終於出城整番靚隻牙！

佢話：「食食吓飯見到許醫生嘅留言，好感動，有一個專業嘅牙醫可以即刻話我知個情況係點，當我聽到一個專業人士口中講可能會感染，我真係驚喇，然後就麻煩許醫生幫我預約今日有開門嘅診所，佢好錯愕我仲未去整牙，但係整咗1日蛋餅，挑戰牙醫嘅底線，真係好專業。好喇，我一陣就會變番好靚嘅Regen，冇得娛樂大家喇，我依家亦都非常非常緊張，因為我好驚整牙，崩牙少事，整牙先大件事。」

事隔幾粒鐘，佢上載「變靚」露齒笑自拍：「係打麻醉針驚到喊咗出黎，肉酸咗少少！」網民都大讚佢叻女，笑言：「我上次打完麻醉暈低咗喺牙醫診所，所以您已經好叻?」