娃娃臉演學生妹冇難度 鄧卓殷天生開心果想喊都難

2021年01月24日 21:00
東網電視
更多新聞短片
2018年奪得港姐亞軍兼最上鏡小姐的鄧卓殷(Amber),早前在無綫劇《踩過界II》飾演一名背景複雜的16歲援交少女,雖初次拍劇但都非常自然,難怪不少網友畀Like!25歲的她飾演16歲學生妹,看來有些難度,幸她擁有一張可愛娃娃臉,加上造型幫忙,最終都成功過關:「呢個角色好有挑戰性,好彩我去試造型着起中學生校服嘅時候,啲幕後同我講完全冇違和感,畀咗我唔少信心。」
演學生妹「零」難度,演悲劇人物卻被考起,她說:「戲入面嘅角色性格,同現實嘅我好唔同,佢好在意身邊好多事,活得好唔開心,而我係一個好容易將唔開心嘢忘記嘅人,所以有一場跳樓自殺戲,我前一晚已經喺度諗啲唔開心嘅嘢,但因為真係忘記晒,惟有幻想啲唔開心嘅嘢出嚟,結果喊咗成晚,拍嘅時候仲口腫鼻腫,但又好切合個角色情緒。」男友郭子豪拍戲經驗比她豐富,問Amber可有向對方請教?她說:「我反而會從角色身份出發,盡力了解角色嘅背景同埋聽歌培養情緒。」
當選港姐後,Amber多數演出綜藝節目,如今終有機會拍劇,她笑言對綜藝以及戲劇同樣很感興趣,希望繼續雙線發展,至於會否覺得等了一段時間才有劇拍?她說:「我覺得啱啱好,因為初初出嚟做主持,發現自己面對鏡頭會有啲拘謹同埋講嘢有語病,之後我不斷拍片糾正自己嘅問題,ready好先去拍劇,我覺得時間好適合。」
事業剛起步,愛情當然想低調處理,郭子豪早前公開讚她是善良好女仔,問Amber覺得男友有甚麼優點?她只笑說:「諗吓先......拍拖都係希望互相欣賞,大家有共同目標,希望大家畀多啲空間我哋發展啦!女仔都係想搵一個好錫自己、會為雙方着想嘅伴侶。」哪男友合格嗎?她只笑不語,果然是「不能說的秘密」!
服裝:MAX&Co.
場地:台北·寬巷子@海港城