樂壇第5張成績表　ViuTV加入戰團搞頒獎禮

香港樂壇向來有4個頒獎禮，呢4張成績表就係來自無綫同埋3個電台，不過呢個局面好快被打破，因為ViuTV宣布加入戰團，會舉辦第5個樂壇頒獎禮。ViuTV音樂節目《CHILL CLUB》今晚宣布喺今年4月舉行第1屆音樂頒獎禮「CHILL CLUB推介榜年度推介20/21」，有別其他頒獎禮年尾埋數嘅習慣，玩法係根據上年5月31日至今年2月28日CHILL CLUB推介榜嘅成績，選出年度推介歌曲、年度推介男、女歌手、組合、新人等，據知呢個頒獎禮所頒發嘅獎項類別同埋數量，同叱咤樂壇流行榜頒獎禮相似。其實舊年已經有傳聞話ViuTV想搞頒獎禮，之後喺節目巡禮仲話頒獎禮賽果係全民投票。