「鐵人」都會攰！馮盈盈邊食邊瞓覺

前港姐冠軍馮盈盈（FYY）備受無綫力捧，呢排喺電視機真係老是常出現，連續做咗幾個大騷主持，分別係《萬千星輝頒獎典禮2020》、《慈善星輝仁濟夜》、《big big shop新春感謝祭》，仲未計本身佢又主持開《#後生仔傾吓偈》加埋劇集，堪稱「新一代無綫爆騷王」！

咁都未夠，呢排FYY仲密密為無綫節目《天天開運王》開工，每日由朝拍到晚，雖然佢都係後生女，但鐵人都有攰嘅時間！等埋位嘅佢，終於都忍唔住邊食邊瞓覺，仲要瞓到反白眼，要助手叫先識起身，但難得佢一叫就醒仲要扮冇事繼續食嘢，佢自己都忍唔住感慨留言：「好似有過度活躍嘅我，都會有好耗盡嘅時候，呢幾年都攰啦，我都會無電。」