吳千語進駐九肚山5,000萬豪宅　30歲前做人妻不是夢

舊愛林峯結婚生埋女，女神吳千語都唔輸蝕，同富三代男友施伯雄打得火熱。據知千語BB地位日漸升呢，已經由南灣愛巢進駐九肚山大屋，呢間大屋認真唔講得笑，3層連天台市值約5,000萬。依家27歲嘅千語BB講過希望30歲前做人妻，睇嚟呢個夢想好快實現。

準備做人媳婦，梗係要持家有道，千語BB不時喺社交網晒新居之餘，亦大晒廚藝大宴親朋。原來施伯雄好鍾意Snoopy，新愛巢亦見有唔少Snoopy公仔，千語BB當然識做，屋企喪擺Snoppy啦！對於被指學廚催婚兼搬大屋一事，吳千語透過經理人回覆：「私人事唔回應了，謝謝！」