何沛珈訪問紅磡爆疫粥店食客 嚇到心慌愈行愈開

2021年01月31日 11:11
東網電視
更多新聞短片
紅磡日前多幢樓宇污水被驗出有新冠病毒,一間粥店更爆發感染群組,多名員工及其家人染疫,早前加入《東張西望》做主持嘅落選港姐何沛珈(原名:何孟珊)被委以重任到該區街訪,佢去到棺材舖、花店做訪問,都未見佢有太大擔心,直至喺街上追訪一位伯伯時,竟然嚇到彈開!
當佢得知對方喺8至10日前曾到訪爆疫粥店時,明顯開始有啲驚慌失措,對方就話搵緊邊度可以做檢測,而何沛珈就愈行愈遠,又擰轉臉望向鏡頭外嘅攝製隊,用眼神「求救」,最後都叫做順利完成訪問!事後佢喺社交網解釋:「其實我好多嘢都唔怕,但嗰刻冇番個N95保護我真係唔敢行咁近!新丁只希望練到周身刀,第日機會來到就可以大派用場!」出完外景佢都立即做番個快速測試,最後冇事都安心晒!
其實《東張》連日都有派主持到疫情較嚴重嘅地區採訪,其中游莨維(1蚊Joe)就去到解封後嘅油麻地廟街、黃愷怡去到曾納入強制檢測大廈名單嘅深水埗長樂大廈、黃耀英到曾被封鎖嘅北角東發大廈,眾人都非常淡定,唔通師姐師兄食過夜粥係唔同啲?
而何沛珈亦透露改名原因,原來係唔想再「慢」:「希望走得更遠更快更耐,不再『孟」』了,多多指教!」