初四咁嘅樣！余德丞殘爆Look做主持嚇壞人

男神崩壞？身為無綫男神之一的小生余德丞，向來被指為高富帥筍盤，3年前踢波時突然暈倒急送院，情況危殆得要在深切治療部留醫，最後被診斷為心律不正，幸好他大步檻過。不過今日余德丞為足球節目當主持時，卻嚇壞不少觀眾，非常關心其健康狀況！

發生何事？事關余德丞出鏡時，明顯雙眼無神，眼袋大大個打孖上，面色超差，鬚根又現，一副3日3夜冇覺好瞓的樣子，主持期間又不斷「食螺絲」。不少網民擔心他的身體再出事，紛紛留言叮囑他小心身體外，更形容他「初四咁嘅樣」：「都未過年，做咩初四咁嘅樣？」、「眼大無神面黑黑，生意失敗？」、「係咪撞到天山童姥中咗吸精大法？腎虧？」、「又瘦，個樣又冇精神」。「初四咁嘅樣」，源自周星馳和吳孟達合演電影《行運一條龍》中經典對白：「年初四，假又放完，錢又使晒，工又要返，點會有好樣呀！」