三年抱兩！岑麗香晒家庭照宣布懷第2胎

藝人岑麗香（香香）2019年為老公強強（Joshua）誕下1子，相隔2年再度有喜，三年抱兩，可喜可賀！今日於社交網上載「一家四口」溫馨合照，宣布懷有第2胎，並取乳名為「小腰果」，香香仲晒埋靚靚孕照，目測6、7個月左右，但佢手腳依然纖幼，果然得天獨厚！而同樣為兩胎之母嘅陳凱琳、倪晨曦、胡定欣、龔嘉欣、陳瀅等紛紛留言送祝福。

好友王君馨受訪時說：「祝佢哋開開心心，身體健康，順利生第2個BB出嚟，好開心佢有美滿家庭，有好錫佢嘅老公，祝BB同香香一樣咁鍾意笑！（幾時到你生呀？）我唔急呀，等上天畀我時，就係最好時間。」最後佢笑言自己係處女黨最年輕嗰個。至於李亞男則說：「好戥香香開心呀！希望BB健康成長，生B順利！」

苟芸慧表示：「恭喜香香同強強一家，收到呢個好消息之後我同大家一樣都好開心！同時都祝福呢個小生命，希望香香一家人生活幸福快樂！至於我自己嘅計劃，依家我覺得最緊要係疫情快點完結，一切生活可以恢復到正軌。」鍾嘉欣說：「恭喜香香！替她們一家很高興，滿滿的祝賀她們！」