陳瀅索家姐曝光　勁有混血兒Feel！

圈中唔少藝人都有個索爆家姐或者阿妹，被指有潛力加入娛圈實行孖住上！藝人陳瀅早前返到加拿大溫哥華陪伴婆婆及家人，順道過埋聖誕節同農曆新年，連日吃喝玩樂嘅佢今日同索家姐Ling合照，令家姐意外登場，獲網友大讚外貌似歌手JW，比起妹妹多咗份混血感覺！

不過翻查番社交網，Ling有逾2,000粉絲追蹤，擔任會計師嘅佢，2013年已經結婚成為人妻，更喺2019年生咗仔仔Nathan，有仔萬事足嘅佢，不時喺社交網上載家庭照，非常享受家庭樂。而佢舊年重返職場，坦言少咗時間見證仔仔成長，但希望可以成為1個出色嘅在職媽媽。