隻字不提王浩信　陳自瑤：清楚了解自己想要咩

藝人陳自瑤（YoYo）尋日喺社交網預告有重要消息宣布，原來係處女下海開設個人影片頻道！第1條片就一口氣解答網民11條問題，片中見佢悉心打扮，以斜肩紅色連身裙上鏡。影片上載短短半個鐘就已經有4千人觀看次數，成績不錯，其中有網民問佢之後會唔會分享同女兒王靖喬嘅生活日常，不過YoYo就話暫時唔會啦，因為想女兒專注學業，希望同普通小朋友一樣成長。

將於8月踏入40歲嘅YoYo，被問到20、30、40歲心態分別有咩唔同，佢坦言：「我記得20歲時仲係好傻，完全唔知自己做緊咩。到30歲，我就應該結婚、有小朋友，我要去學習做一個媽媽去照顧家庭，嗰時同以前少女好唔同，原來有好多嘢要學習。39+1就係依家，唔同嘅就係，你會更加清楚了解自己想要啲咩，同埋應該點樣行。我最鍾意係依家呢個階段，因為可能人成熟咗，學習到好多嘢。」言談間隻字不提老公王浩信外，更隱約意味着現時凡事都要靠自己。