方文山工作室台北最好View　周杰倫拉隊夜訪超讚

台灣天王周杰倫趁過年前，帶埋媽咪葉惠美同老婆昆凌拜訪戰友方文山新工作室，隨即喺社交網放靚相，一係唔睇，一睇就見方文山嘅工作室勁好View，從陽台望出去，可遠眺台北101大樓、南山廣場等著名建築物，連周杰倫也稱讚：「太讚了啦！」睇嚟方文山工作室真係會成為藝人嘅打卡點。

周董又邀一班好友到陽台，以壯闊嘅夜景當背景影相，周杰倫話：「開心文山有這麼棒的工作環境，以後歌詞應該不用等太久吧！」不過五月天主音阿信看到照片，即回覆：「有可能環境愈舒服…歌詞摸愈久。」周董即回：「這個好笑！你那邊是不是也很舒服？」等於間接說阿信創作速度一樣也很慢，即令粉絲笑爆嘴！

方文山喺台灣有詞聖之稱，早年同周董合作並建立深厚交情，之後成為周董御用填詞人，2人共同製作好多受歡迎嘅作品，如《印地安老斑鳩》、《愛在西元前》、《忍者》、《雙截棍》、《七里香》、《夜曲》、《霍元甲》、《不能說的秘密》、《蘭亭序》、《說好的幸福呢》、《龍戰騎士》、《髮如雪》、《威廉古堡》......而《青花瓷》更成永恒嘅經典。周董曾描述自己嘅曲同方文山嘅詞：「我的曲如果沒有方文山的詞，不會中（即受大眾歡迎）；方文山的詞如果沒有我的曲，也不會中。」