【藝人豪宅逐個捉】超蓮秘密花園大到變花市

今日大年初一，藝人紛紛大晒家居賀年照，間接令豪華家居曝光，而且一個比一個奢華！打頭陣嘅有賭王三房千金何超蓮，佢於家中超大後花園留倩影，見整個花園布滿桔樹，而且棵棵都有人咁高，驟眼睇以為佢去咗行花市，大得誇張。

同樣晒樹嘅仲有前組合2R成員黃婉佩（Race）一家，佢家中嘅客廳位置放得落螢光桃花，而囡囡則着上旗袍企喺樹前拜年，相當可愛。至於姜麗文屋企亦有一大棵桃花，佢更特登跌膊，晒香肩贈興。

不過要數最豪嘅，絕對非林文龍與郭可盈一家莫屬。佢哋晒出囡囡向佢哋斟茶拜年嘅合照，見梳化上放咗兩個價值隨時過萬嘅名牌咕?，而囡囡捧住嘅名牌茶具套裝，亦價值近4千元。至於佢哋嘅行頭更加犀利，郭可盈戴上過萬元嘅名牌頸鏈，再配搭過十萬嘅名牌手袋，而囡囡亦孭住名牌手袋出動，一輯簡單居家賀年相價值已高達6位數，非常富貴！