胡歌古天樂姓氏命名新昆蟲　表揚對保護環境貢獻

生態學術期刊《世界生態學》喺最新一期刊登一篇名為《中國四川省叉襀屬（襀翅目：叉襀科）一新種》嘅學術文章，當中提發現咗叉襀科新品種並命名為「胡古叉襀」，而「胡古」呢兩個字就係取自藝人胡歌同古天樂而命名，目的係想感謝佢哋對中國西部山區環境保護同埋基礎教育事業做出嘅貢獻。一眾網民知道消息之後一致認同，仲大讚佢哋「靚仔有善心」！

胡歌喺2005年開始參與公益活動，每年都出錢出力做善事，包括資助孤兒病童、汶川地震捐款賑災、捐贈希望小學等。而古天樂自2008年汶川大地震後，更成立咗慈善基金，至今相繼捐建多間醫療室、水窖以及過百間小學等。雖然佢哋每次做善事都好低調，今次公開以新昆蟲用佢哋嘅姓命名，相信係為咗表揚胡歌同古天樂對保護環境嘅貢獻。