【鄭伊健開年食風】蒙嘉慧買蛋撻慰勞工人　結果勁爆笑

藝人蒙嘉慧近日將興趣轉化為事業，獲老公鄭伊健打本過百萬，喺福岡開設房地產公司，主打物業管理及移民等服務。作為CEO嘅佢，忙於事業，好多事情交畀家傭打點！繼歌手張敬軒之前請咗個世界級「姐姐」，喺佢手上無論乜嘢菜式，都會變得充滿娛樂性，煮法都同人別樹一格，估唔到蒙嘉慧個「姐姐」都差唔多！

佢喺社交網透露買咗蛋撻返去請「姐姐」食，點知……「姐姐」竟然蒸嚟食：「忍唔住又買咗嚟食，跟住順口問姐姐：『上次買畀你食，你鍾唔鍾意食？』姐姐：『太太，好食呀！我蒸咗嚟食！』」唔少網友笑言好搞笑，有人問其實「姐姐」係咪話叮嚟食咋，但蒙嘉慧笑言：「屋企冇微波爐。」

另外，佢又晒出同姨甥孫嘅合照，指姨甥孫同老公玩捉迷藏，點知姨甥孫唔記得數數字，搞到老公要喺外面吹風：「姨丈公：『你數到10就嚟搵我啦⋯⋯』姨甥孫：「1、2、3.......？」弊，之後唔記得係乜添，可憐姨丈公在戶外吹冷風。」