【密照曝光】「威龍潘金蓮」梁茵疑嗒律師人夫
20210216
東網電視
更多新聞短片
![](/hk/bkn/cnt/entertainment/20210216/photo/bkn-20210216000211847-0216_00862_001_01p.jpg?20210216031244)
無綫藝人梁茵於處境劇《愛.回家之開心速遞》飾「威龍潘金蓮」Anita,專釣金龜,將拜金港女演得入型入格。現實中的她貫徹「進擊」性格,除了經常收兵,更愛向異性狂放生電,近日更被爆人夫都唔放過,捲入「小三疑雲」!
有讀者爆料指她疑搶人老公,入馬場黐人夫,據知男方是一名有米律師,除了擁有自己的律師事務所,更榮升馬主,非富則貴。該讀者提供2人的密照做證,見梁茵冧爆甜笑,與男方面貼面自拍,又有甜品及蠟燭,似是早前男方為她慶祝27歲生日。另一張相則是男方一家三口的全家福,兩夫妻育有一名約5歲的兒子。
「唔知你講邊個」
入行近8年的梁茵,初期多演閒角,直至加入《愛》劇劇組才為人熟悉,但成功入屋後便是非多多。早有前科的她,除了曾被拍得收工時獲同劇資深演員黎彼得特別照顧接送回家外,去年更被影到陪西裝中佬撐枱腳,她更以短裙上陣,不時咬唇放電,名副其實「中佬殺手」!她又捲入層壓式推銷風波,負面新聞一浪接一浪!
記者致電梁茵,問到是否搭上律師人夫?她表示:「唔知你講緊邊個,好搞笑!我同邊個見面聚會都會傳緋聞,前排同一個上市公司主席普通食飯,又話我哋密會。我同朋友影相好Close,攬頭攬頸表現Friendly就畀人話好姣。」後來她看到讀者提供的有米律師合照後,才表示認識對方,但聲稱只屬普通朋友關係:「我哋係朋友,知佢係做律師,至於對方有老婆仔女就唔清楚,我哋未熟到會知道人哋咁多嘢,亦唔會去問人哋嘅家事。(之後會避忌?)堅持做自己,如果我拒絕同人影相,又會畀人話高竇、紅咗好難接近。」
「佢喺後面攝鏡」
她續指所謂密照只是一場誤會:「我當日純粹自拍,佢只不過喺後面攝鏡。」更大呻無辜,直言想搣甩「中佬殺手」稱號:「我都唔明點解短短一年內,不斷同中年男人傳緋聞,明明有後生仔追求我,真係好無辜!係咪『潘金蓮』角色太深入民心?我真人根本唔係咁!呢啲新聞好影響我形象,之前已經令我損失咗啲工作。」記者亦有致電男主角,但他拒絕受訪,立刻掛線。