講蔡思貝即傻笑！胡鴻鈞情史逐段數你聽

早前東網率先踢爆藝人蔡思貝同胡鴻鈞拍拖之後，佢哋一直都冇承認，仲解釋係朋友關係，不過上年東網再爆蔡思貝揸住男方家姐架名貴跑車代步，相信已經順利融入胡家。有指農曆新年胡鴻鈞亦去咗女方親友屋企拜年，戀情都浮晒面喇！呢日胡鴻鈞受訪嗰陣就大談情史，而聽到蔡思貝個名就即刻傻笑，怕醜到不得了，即刻去片睇吓！

歌手JW（王灝兒）同譚嘉儀今個新年有假放，可以同家人過節。問到有冇被親友催婚，佢哋都異口同聲話冇，而單身嘅嘉儀雖然話感情唔心急，但亦開口話：「你介紹畀我？」JW亦一口答應：「好呀，我幫你睇住！」有埋JW幫手，相信嘉儀好快有着落喇！

嚟到農曆新年，唔少人都會寫揮春應吓節，到底邊個女星手字靚呢？今次就有張寶兒同廖碧兒嚟個大比併！一號選手張寶兒搵埋阿妹張寶欣齊齊寫揮春，老公袁偉豪仲亂入寫埋一份。而二號選手就係喺加拿大溫哥華長大嘅廖碧兒，佢不嬲都鍾意中國文化，趁新春佳節仲即席揮毫寫個「福」字。唔知大家覺得邊個寫得靚啲呢？想睇更多精彩內容，就要留意今集《繽FUN主播室》喇！