《造星III》KLAU同KiKi深夜僻處煲煙調情　經理人：會注意行為

ViuTV選秀節目《全民造星III》多戀事，尤其係張凱娸（KiKi）跟劉瑞祈（KLAU）更係打得火熱。雖然2人已公開戀情，但一直都好低調，仲拍拖拍到去馬鞍山僻靜處添！有指佢哋前晚近深夜揸車到馬鞍山，見冇乜人就除低口罩錫錫，之後仲一齊煲煙。

東網致電2人，佢哋經理人就話：「佢哋開始咗唔係好長時間，大家畀啲空間呢對小情侶！（公眾地方除口罩煲煙？）佢哋都知自己係公眾人物，之後會注意自己行為。」而KLAU接受訪問表示：「我同KiKi係緣分底下認識，慢慢通過相處同了解，覺得對方係一個好特別嘅女仔，所以慢慢發展。」至於在車廂中激嘴？他說：「同好多熱戀嘅情侶一樣，親熱係正常不過嘅事。凌晨時分喺自己駕車畀人偷拍，難免會無奈，但作為公眾人物以後會多加小心，最後收到大家嘅祝福都好開心。」