上埋港聞！ANSONBEAN被爆勁曳係「超級問題少年」

喺ViuTV《全民造星III》獲得季軍嘅ANSONBEAN（陳毅燊），年僅20歲，憑住煞食外形及精湛跳唱俘虜唔少網民，形象正面討好，仲成為古天樂及Angelababy新公司旗下首位藝人，不過最近被爆出成籮黑歷史！

ANSONBEAN頻頻登上娛樂新聞，不過原來仲試過上港聞！有中學同學話佢當年好曳，14歲時喺赤柱大街貪玩爬上排檔簷篷「飛簷走壁」，結果墮地爆缸送院！喺老師眼中更係「超級問題少年」，更被同學懷疑係咪有過度活躍症！佢試過將條麻繩，綁住把開着咗嘅風扇葉上扮泰山，但因為假天花受唔到力，最終連人帶扇跌落嚟，但好在人冇事！又因為髮型唔及格被老師要求剃光頭，中五時又試過做「逃學威龍」，爆學校鎖跳出圍欄，最終被停學2星期！不過成績就中上，但中六時就被父母送到英國讀書。

而喺情場上都唔嘢小，話佢好有女性緣，雖然阿媽唔畀佢拍拖，但因為住校舍關係都管唔到咁多，同女同學拍過幾次拖，但都係好短暫，最長得1年！不過就直言ANSONBEAN對同學唔錯，只係太百厭成日闖禍！

ANSONBEAN受訪時認奀皮，叫大家唔好學：「細個比較奀皮呀！大家唔好學呀！哈哈，唔會㗎喇依家，依家啲精力用咗去練習唱歌跳舞！」而經理人就表示：「佢細個係比較頑皮，小朋友整親都好平常啦，大個咗就定番啲成熟啲㗎啦！依家佢好乖㗎喇！」