黃聖依屋企住106人　超華麗豪宅曝光！

內地女星黃聖依與丈夫楊子感情要好，近日佢哋都嗌埋楊子媽咪一齊上真人騷夫妻節目《婆婆和媽媽》第2季，竟然意外令楊子豪門家族人丁興旺嘅一面曝光，令人震撼！

黃聖依於節目中自爆老公一家人丁過於興旺，家中人數量龐大多至逾100人，屋企人多到佢都冇時間同奶奶單獨相處，嚇到同場藝人如董璇等非常震驚，網友更直呼楊子呢個名門望族真係家業偉大！

黃聖依早前更喺社交網晒出家族聊天群嘅聊天紀錄截圖，人數顯示有106個人，家族更集體換頭像為奶奶慶祝生日。而奶奶喺家族地位崇高，之前黃聖依阿仔安迪想去遊樂園玩，奶奶就為佢起咗個遊樂園，之後安迪想去滑雪，奶奶又為孫仔建造滑雪場，被網友力讚不愧係豪門奶奶！

節目中楊家豪宅亦一同曝光，唔單止面積大，且裝修十分豪橫，似足酒店咁大間，有晒私人泳池、轉角長樓梯、巨型雲石牆等，唔怪得網友都評論道：「貧窮限制了我的想像！」