朱千雪「無飯」主婦下廚即失手　水蛋蒸極唔熟

前港姐朱千雪前年8月下嫁醫生老公Justin，升呢人妻已近年半嘅佢，呢日自爆原來廚藝欠佳，絕對係「無飯」主婦。佢喺社交網透露下廚失手，更公然向網友求救，佢表示：「今晚整咗兩個0失敗嘅餸，蒸水蛋、豉汁蒸排骨，結果兩個都失敗。Recipe話每樣材料用1茶匙，點知唔覺意全部用咗一湯匙。水蛋蒸極都唔熟，45分鐘後，個邊都燶埋，但係中間全部都係水，究竟做錯乜？」唔少網民即笑指佢應向「2LINE黨」好友、兩女之母張嘉兒惡補廚藝。