中國G-Dragon吸800萬粉絲　真身似小夫令網民心碎！

疫情期間大家都罩不離口，大陸有網紅就憑住戴口罩，吸咗800萬粉絲，你都咪話唔勁！網紅七鶴大人開社交網以來都保持神秘感，唔係笠住個口罩，就係用電話遮面，淨係露出迷人電眼，打扮又似韓仔咁，仲有網友封佢做「中國G-Dragon」！ 不過有時呢，保持神秘比較好！事關七鶴大人被網友揭開真面目，喺網上爆出佢個真樣，話佢身高唔夠160cm，仲指佢個樣似《多啦A夢》嘅小夫，令網友非常失望，理想同真實真係差好遠呀！

落選港姐黃婉恩（Yancy）月初因右腳後㬹斷筋要入院做手術，打晒石膏行路都有困難，當時佢都話預計差不多成3個月先會好番，不過尋日就傳嚟好消息，佢已經可以拆石膏轉腳托，嚟緊仲會做物理治療。 佢喺社交網上載自己拆石膏嘅過程，見佢轉用腳托之後仲要撐住拐杖出入，不過同時佢又晒出自己出街食好西嘅靚相，早兩日又繼續晒挨欄杆嘅街頭Snap Shot，果然真係愛靚唔愛命，傷到咁都仲要四圍走影靚相。