客串《十月初五》！余德丞大讚何依婷分飾3角犀利

藝人余德丞有份客串演出無綫新劇《十月初五的月光》，飾演海俊傑的「祝展輝」青年版，他表示能夠參與翻拍神劇，即使是小角色都已經好開心︰「21年前都有睇原版，係非常經典嘅劇集，當時係喺澳門取景，而今次就主要喺香港嘅流浮山，都開咗幾日工。」

他透露跟何依婷最多對手戲，又大讚對方1人分飾3角相當犀利︰「對住佢1個人，其實等於對住2個角色，一時溫柔、一時野蠻。（有冇被打？）咁又未去到咁被虐待，不過會經歷由未做情侶、戀上、到分手，有齊喜、怒、哀、樂。」之後會想嘗試1人分飾多角？他表示︰「咁就梗係想，作為演員都想挑戰自己，喺戲劇入面係經歷另一身，分飾多角就係經歷幾個人，所以係好特別！」