張敬軒遮遮又嚟料 煮乜搞到電飯煲爆炸?

2021年02月22日 20:02
東網電視
更多新聞短片
歌手張敬軒家中傭人姐姐(遮遮)憑住親自炮製嘅「災難級早餐」,而爆紅成為「早餐KOL」,當中佢最「拿手」當然係清一色麵包配粥水嘅「碳水放題」套餐啦,不過呢日張敬軒就大爆遮遮竟然煲粥煲到連個煲都壞埋,認真誇張!
張敬軒於社交網晒出與遮遮嘅對話截圖,遮遮告知佢電飯煲經已「Explode(爆炸)」,並只拍下剩餘嘅電線插頭,連「屍骸」都唔見,似乎「爆煲」情況慘烈。張敬軒對此大感不解,佢表示:「我真係諗都冇諗過,最先頂唔住嘅竟然唔係我,而係屋企個電飯煲......煲粥煲到個煲都爆埋,我諗佢係港九新界第一人。」
佢又笑指:「Dearest煲,你辛苦了,我都唔差,下次希望你可以做個燜燒煲、真空煲、沙煲... 總之乜煲都好喇!最緊要記住唔好返嚟我哋屋企!佢想買過個新煲但係都仲要有煲粥功能,你睇佢幾執着,放下喇施主,方丈Yak粥Yak到想還俗。」