認同關智斌好多關係 張敬軒自爆成日傾電話

2021年02月22日 20:23
東網電視
更多新聞短片
歌手張敬軒出席活動,講到很久沒有「亮相」記招,他笑言「恍如隔世」,又指今年會多加努力。當被追問密友關智斌被傳「另結新歡」,軒仔笑言:「早幾日我同佢先至喺公司飯局見過。(識得『新歡』?)大家身邊都有咁多朋友,邊度識得晒?(同佢淡咗?)冇淡,我同佢有好多關係,公事上嘅同事,私人生活係出生入死嘅戰友,我哋呢排成日傾電話,講吓今年嘅發展,同埋有新嘅label,睇吓點做多啲歌。」
同「遮遮」鬥長命
講到與家傭「遮遮」似歡喜冤家,軒仔笑言:「呢排成日食粥同麵包,好似洗腸咁,不知幾乾淨。(遮遮知唔知你話佢?)知,我有同佢講,原本係禮貌嘅提醒,點知佢變本加厲,今日仲整爆個煲,我喺度諗,如果個煲有生命嘅話,佢會同我講:『我走先喇,你慢慢捱啦!』(你同遮遮關係點?)鬥長命囉,不過佢有啲優點我係冇講嘅,例如佢清潔好乾淨,我會畀120分,本來我係請佢照顧我父母嘅,但佢哋仲喺廣州落唔到嚟,留喺廣州有留喺廣州幾好,安全啲,起碼唔使我咁擔心。」談到其餐廳生意,軒仔表示:「午市不嬲都生意唔錯,呢兩日開返晚市,好多舊客都即刻返嚟支持。」