Anton骨枯隊友反對離隊 ONE PROMISE約定舞台見

20210222
東網電視
更多新聞短片
環球樂隊ONE PROMISE去年底受「重挫」,鼓手Anton因2隻手指出現骨枯症狀,無奈宣布「停賽」1年休養,一度萌生退隊念頭!不過「震撼彈」卻令4子兄弟情大躍進,約定他日重踏舞台展現光芒。
新歌《明年見》是ONE PROMISE特別為Anton而作,加上疫情關係,更加需要正能量。主音文廸表示早於年多前得悉Anton患骨枯,公開病情之前,試過好多方案嘗試解決,他說:「叫佢打少啲、喺鼓嘅編排上輕鬆啲、轉打鼓嘅方法,佢又曾經試過一隻手打鼓,但結果都係唔得。」更大爆有次聽到對方在房間大聲喪叫「真係唔得喇我!」、「太遲啦!」,深怕Anton一時睇唔開,天衡接話:「以為佢收咗份報告話以後冇得打鼓,有諗過使唔使睇吓佢,最後選擇message佢,點知佢話錄緊自己channel嘅嘢。」
Anton一直予人感覺樂觀正面,但得悉手指骨枯後曾有一段低潮期,負面情緒一湧而上,全靠朋友支持及陪伴才能渡過難關:「聽到真係好shock,連醫生都話唔關打鼓事,骨枯有幾個原因,飲好多酒、潛水或者之前SARS受過治療用過好多類固醇,但我完全唔中,醫生仲話好少喺手指尾嗰度,係冇先例。」又自爆有提出過離隊,因自覺成為負累:「開始有好多人支持我哋嘅時候,我打唔到鼓會累咗佢哋,但最後3對1反對我走,好兄弟話:『冇咗你咁我哋仲夾嚟做咩呀?就唔夾啦!』聽到又真係幾sweet!」雖然暫時退下火線,不過他大賣關子笑言想到用另一身份跟fans見面:「想試吓做啲打鼓以外嘅事,其實個世界好大,有好多唔同嘅方法進步,為咗可以快啲好番再次上舞台,會keep住睇醫生,勤力啲去飲中藥。」
另外,文廸興奮指新歌訊息「明年見」背後有個彩蛋,就是跟Sora未出世的BB甜蜜對話。準爸爸Sora坦言未ready做爸爸,並指對新身份感到壓力:「要再努力啲搵錢。(會入產房剪臍帶?)尊重老婆,如果佢想我入去就入。」又指自己會是慈父,其餘3子都舉手贊同,卻意外大爆他是購物狂:「一定畀晒最好嘅嘢小朋友,因為佢好鍾意買嘢,新使錢路線!」還齊齊自薦反串做「契媽」幫手湊B!