胡鴻鈞自爆同何麗全見面：好緊張好大壓力！

藝人胡鴻鈞（Hubert）在流浮山為無綫新劇《十月初五的月光》拍攝外景。無綫人事大變陣，何哲圖離任星夢娛樂行政總裁，Hubert約滿星夢後，唱片合約回復自由身，他透露昨日與何麗全及無綫助理總經理樂易玲見面，他笑說：「第一次見何生，咁啱主席許濤路過，所以好緊張，好大壓力。我有祝主席新年快樂，佢就祝我身體健康。」

他指已約滿星夢，今次與何麗全見面只是互相了解，未有深入討論發展，但進度理想兼有共識，不過合約問題則交由經理人處理。他又謂不擔心星夢舊拍檔變成「孤兒仔」，相信公司會有安排。問到可有其他唱片公司招手？他說：「OK嘅，自己想搵一間有共同音樂理念嘅公司。（何哲圖話開新公司，有冇搵你？）有傾過可能性，但都係交畀經理人處理啦。」

講到新劇，他指沒有咀戲，而且經驗也不多，又笑言可能是女拍檔拒絕，不過並非怕緋聞女友蔡思貝扭耳仔！講到新年他到蔡思貝親友家拜年，Hubert否認是見家長，只是聚會，也沒有被催婚，大家多關心他的腳傷，媽媽也有幫他攝太歲。