【陷桃色風波】費事累兄弟　保錡宣布無限期停工

組合ERROR成員吳保錡上月爆出與33E宅男女神張沛樂（沙律）撻着，被指與前度女友未斬纜，疑一腳踏兩船外，更陷桃色風波，跟健身女教練等有親蜜關係。飽受負評的他，更一度開直播爆粗與網民隔空對罵，令其形象再度插水，他今日於社交網發文，宣布為免影響ERROR，決定停工！

他承認處理感情事未夠完善，以及直播時言行舉止不妥，誠懇致歉：「我意識到一方面我之前處理感情嘅事做得唔好，另一方面，當晚直播嘅言行舉止係好唔啱，說話亦無尊重過人。呢啲全部都係我嘅過失，我要面對自己嘅錯，出嚟同大家再次道歉。」

他續指其組合的MV以及亮相的節目等，均因他而備受抨擊，抹煞其他藝人、團隊的努力，對此他大感內疚，故主動向公司提出停工：「我已經同公司講，喺完成手頭上已開始嘅工作之後，所有工作將會暫停。我亦唔會參與任何節目及ERROR歌曲嘅宣傳。我認為咁樣係一個對我應有嘅懲罰，希望唔好累到其他兄弟，亦唔好因為我嘅關係而抹煞咗所有人嘅心血。」