女人30有壓力!蔡思貝欽點胡鴻鈞一齊拍劇

2021年02月23日 21:54
東網電視
更多新聞短片
視后蔡思貝為繽FUN Live擔任嘉賓,與主播俞詠文分享心事。她透露現在是自我增值期,4月會接拍古裝喜劇。講到她之前被網友攻擊,問到現時可還會睇留言?她坦言:「點都會睇,私訊都會睇,好多有心粉絲提點我,我唔會為難接受嘅comment而唔睇,自己過濾就算,唔好咁上心。(睇化?)人生唔會睇化,但依家程度好好多,識得過濾,自己調節心情。」
期間緋聞男友胡鴻鈞(Hubert)、拍檔張振朗突入繽FUN Live,兩人的互動亦十分搞笑!問到可會與Hubert合唱?她笑言:「我相信佢會抗拒,佢係情歌小王子,唱live畀人讚,我同佢唱會影衰佢,但我相信緣分,如果劇一齊拍,同佢做拍檔,可以一齊主題曲、片尾曲或插曲。」問到如果世上只得Hubert及振朗2個男人,會揀誰陪自己?她即要飲水定驚,想了很久後,她攞爸爸做擋箭牌,扯開話題謂:「同振朗做拍檔好多部,未同胡鴻鈞拍劇拍檔,試吓都可以,想試同唔同拍檔合作!」
講到她入行7年緋聞多多,外表Cool爆的她坦言自己性格兩極:「我有時好似開籠雀,但有時又會唔出聲,入咗自己世界,我好極端,好少中庸,我嘅朋友都知,我當然有tune,依家做嘢知道唔可以只喺自己世界,要中庸啲。」
說到電影,思貝跟張家輝拍過電影《陀地驅魔人》,她以「發夢」來形容這次經歷:「當年家輝哥賞識我,我好似發緊夢咁,仲想發多一次,嗰陣年資真係好淺,睇番自己好冇經驗,人哋叫我就做,冇乜自己睇法,依家想喺角色發展上加多啲自己嘅嘢。(有冇畀家輝鬧過?)冇喎!定係我唔記得咗?我係一個善忘嘅人,我係鍾意畀人折磨嘅演員,好希望呢啲事情發生,我好鍾意畀人折磨。」
剛剛踏入3字頭,思貝坦言有29+1的壓力:「原來自己經歷30歲時,嘩!原來我都唔後生,我唔係最細嗰班,有壓力嘅!我同自己講,你冇時間去浪費,男性愈老愈有,你睇三哥(苗僑偉)!但女性老咗就少一啲本錢。」