湯怡今日嫁麥秋成　最興奮竟然係阿Bob？

湯怡（Kathy）與麥秋成趁今日元宵佳節於陽明山莊舉行婚禮，一對新人尋晚就各自做上頭儀式，兩個都有默契晒出龍鳳燭嘅相，心連心愛相隨，佢哋仲好一致咁同時間晒出戴上口罩嘅結婚相，大肚湯怡除咗晒出手拖手婚照外，佢身上條Gown更加晒出逼爆4吋事業線，真係Big到大家抖唔到氣咁滯！

麥秋成就貼出佢輕攬湯怡腰肢嘅婚照，二人頭貼頭又張開手，湯怡笑到眼都彎埋，而佢哋都留言指因禁聚令關係，嘉賓人數有所限制，仲話希望疫情過去後就會舉辦大型婚宴，非常有心。

麥秋成留言一出，點知就引到林盛斌（阿Bob）出嚟，豪氣留言：「等緊同你認真劈一次❤️❤️❤️」估唔到呢場婚禮最興奮嘅人竟然係愛好杯中物嘅阿Bob！