【明晚「復出」】小豬被路人負評　即剝口罩回3字真言

台灣舞王羅志祥（小豬）日前宣布明晚會於個人影片頻道發布第1條片，成為佢復出頭炮，係威係勢嘅佢，未見有片已有Sneak peek！據台灣媒體報道，首集內容係聆聽民眾對佢嘅評價，除搵嚟藝人賴以琳於台北西門町街訪，佢自己就喬裝成清潔工從旁聆聽，據悉有路人直接批評佢係「渣男」，但小豬不僅未動怒，更摘下口罩高EQ回應對方：「我會改！」同時又有路人為佢加油打氣，希望佢重返演藝圈。

台媒問小豬點解選擇做街訪？佢表示咁先可以聆聽真正聲音，佢就可以以真誠態度嚟應對同回應：「人生的腳步不會停止，我還是會繼續保持心中的熱愛。」不過對於去年受邀參加朋友泳池P被解讀成「淫亂派對」，至今仍耿耿於懷，佢繼續呼籲外界唔好再被不實報道誤導。佢又提到頂樓起泳池嘅爭議，佢解釋：「那不是游泳池，只是造景，深度只到小腿。」

另外，小豬於社交網限時動態晒出自己舊年6月嘅半裸照，大晒肌肉，並自嘲依家太肥，繼續為佢嘅「減肥KOL」之路鋪路。